နိုင်ငံခြားအာမခံ ကုမ္ပဏီများ အသက်အာမခံ လုပ်ငန်းလိုင်စင် လျှောက်ပါက ရာနှုန်းပြည့်ရင်းနှီးမြှုပ်နှံခွင့်ပြုမည်

 
နိုင်ငံခြားအာမခံ ကုမ္ပဏီများ အသက်အာမခံ လုပ်ငန်းလိုင်စင် လျှောက်ပါက ရာနှုန်းပြည့်ရင်းနှီးမြှုပ်နှံခွင့်ပြုမည်ဖြစ်ကြောင်း စီမံကိန်းနှင့် ဘဏ္ဍာရေးဝန်ကြီးဌာနမှ အကြီးတန်းအရာရှိတစ်ဦးကပြောကြားသည်။
 
လက်ရှိတွင် အာမခံလိုင်စင်များ ချပေးရာ၌ အသက်အာမခံလုပ်ငန်းနှင့် အထွေထွေအာမခံလုပ်ငန်းဟူ၍ နှစ်မျိုးရှိကြောင်း၊အထွေထွေအာမခံလုပ်ငန်း လုပ်ချင်သည့် နိုင်ငံခြားအာမခံ ကုမ္ပဏီ အနေနှင့် ပြည်တွင်းကုမ္ပဏီများနှင့် ဖက်စပ်လုပ်ကိုင်နိုင်ပြီး ကုမ္ပဏီဥပဒေအရ ၃၅ရာခိုင်နှုန်း ရှယ်ယာထည့်ဝင်နိုင်ကြောင်း ၎င်းကဆိုသည်။
 
အာမခံလုပ်ငန်းကြီးကြပ်ရေးအဖွဲ့သို့ လာရောက်လျှောက်ထားသည့် နိုင်ငံခြားအာမခံ ကုမ္ပဏီ ၂၄ခုရှိပြီး တရုတ်၊ဂျပန်၊ကိုရီးယား၊အိန္ဒိယနှင့် အမေရိက တို့မှကုမ္ပဏီများဖြစ်ကြောင်း ယင်းကုမ္ပဏီများသည် ပြီးခဲ့သည့်နှစ်ကတည်းက အစိုးရထံလျှောက်လွှာတင်ထားခြင်းဖြစ်ကြောင်း စီမံကိန်းနှင့် ဘဏ္ဍာရေးဝန်ကြီးဌာနထံမှ သိရသည်။
 
လက်ရှိတွင် မြန်မာ့အာမခံလုပ်ငန်း အပါအ၀င် ပုဂ္ဂလိက အာမခံ ကုမ္ပဏီ ၁၁ခုက အာမခံဝန်ဆောင်မှုလုပ်ငန်းများ လုပ်ကိုင်လျက်ရှိပြီး ယင်းလုပ်ငန်းအားလုံး မှနှစ်စဉ်ရရှိသည့် ပရီမီယံကြေးမှာ ကျပ်၁၁၄ ဒဿမ ၃ဘီလီယံရှိကြောင်း စီမံကိန်းနှင့် ဘဏ္ဍာရေးဝန်ကြီးဌာနထံမှ သိရသည်။