ဝင်ငွေခွန် ဥပဒေသစ် လာမည့်နှစ် အတည်ပြုပြဋ္ဌာန်းနိုင်ရေး ဆောင်ရွက်

အသစ်ပြန်လည်ရေးဆွဲနေသည့် ၀င်ငွေခွန်ဥပဒေကို လာမည့်၂၀၁၉ခုနှစ်တွင် အတည်ပြုပြဋ္ဌာန်းနိုင်ရေး ဆောင်ရွက်နေကြောင်း ပြည်တွင်းအခွန်ဦးစီးဌာနထံမှသိရသည်။
 
အဆိုပါဝင်ငွေခွန်ဥပဒေမှာ ၁၉၇၄ ခုနှစ်က ဆိုရှယ်လစ် စနစ်ကို အခြေခံပြီး ရေးဆွဲခဲ့သည့် ဥပဒေဖြစ်၍ ယနေ့သွားနေသည့် ဈေးကွက်စီးပွားရေး စနစ်နှင့် မကိုက်ညီသဖြင့် ပြန်လည်ပြင်ဆင်ရမည်ဖြစ်ကြောင်း၊ယင်းသို့ပြင်ဆင်ရာတွင် ဥပဒေ၏ ရာခိုင်နှုန်း၅၀ခန့်ကို ပြန်လည်ပြင်ဆင်ရမည်ဖြစ်ကြောင်း ပြင်ဆင်ရေးဆွဲမည့်အစား အသစ်ပြန်လည်ရေးဆွဲရန် ဆုံးဖြတ်ခဲ့ခြင်းဖြစ်ကြောင်းသိရသည်။
 
ယင်းဥပဒေကို အပြည်ပြည်ဆိုင်ရာ ငွေကြေးရန်ပုံငွေအဖွဲ့နှင့် ကမ္ဘာ့ဘဏ်တို့ပူးပေါင်း၍ ၂၀၁၇ခုနှစ်ကစတင်ကာ ပြင်ဆင်ရေးဆွဲဆောင်ရွက်နေခြင်းဖြစ်သည်။အဆိုပါ အခွန်ဥပဒေသစ်တွင် အခွန်ထမ်းများအတွက် ပိုမိုရှင်းလင်းပြည့်စုံသည့် အသေးစိတ်အချက်အလက်များ ပါဝင်ရေးဆွဲမည်ဖြစ်ကြောင်း သိရပြီး စည်းကမ်းတင်းကျပ်မှု ကင်းလွတ်နေသော ၀င်ငွေဆိုသည့် ခေါင်းစဉ်ကိုလည်း ပယ်ဖျက်မည်ဖြစ်ကြောင်းသိရသည်။