ပြည်တွင်းပြည်ပ ရင်းနှီးမြှုပ်နှံမှုလုပ်ငန်း ၁၄ခု မြန်မာနိုင်ငံရင်းနှီးမြှုပ်နှံမှု ကော်မရှင်က ထပ်မံခွင့်ပြု အမေရိကန်ဒေါ်လာ ၆၁သန်းကျော်မြှုပ်နှံမှုတွင် အလုပ်အကိုင် အခွင့်အလမ်း ၁၁၀၀၀ကျော်ဖြစ်ထွန်း

မြန်မာနိုင်ငံရင်းနှီးမြှုပ်နှံမှု ကော်မရှင်က မေ၁၂ရက်တွင် ပြုလုပ်သည့် အစည်းအဝေး၌ ပြည်တွင်း၊ပြည်ပ ရင်းနှီးမြှုပ်နှံမှု လုပ်ငန်း၁၄ခုကို ထပ်မံခွင့်ပြုခဲ့သည်။နိုင်ငံခြားရင်းနှီးမြှုပ်နှံမှုလုပ်ငန်းလေးခုနှင့် မြန်မာနိုင်ငံသား ရင်းနှီးမြှုပ်နှံမှုလုပ်ငန်း ၁၀ခုတို့ကို ခွင့်ပြု၊အတည်ပြု ပေးခဲ့ခြင်းဖြစ်သည်။
 
 
နိုင်ငံခြားရင်းနှီးမြှုပ်နှံမှုတွင် စက်မှုကဏ္ဍလုပ်ငန်းတစ်ခု၊အခြားဝန်ဆောင်မှုကဏ္ဍတစ်ခု၊လယ်ယာကဏ္ဍတစ်ခုနှင့် အိမ်ရာအဆောက်အအုံ တည်ဆောက်ဖွံ့ဖြိုးမှုကဏ္ဍ တစ်ခုတို့ကိုခွင့်ပြု၊အတည်ပြုပေးခဲ့ခြင်းဖြစ်ပြီး၊မြန်မာနိုင်ငံသားရင်းနှီးမြှုပ်နှံမှုတွင် ဟိုတယ်နှင့်ခရီးသွားကဏ္ဍ၌ လုပ်ငန်းလေးခု၊စက်မှုကဏ္ဍ တွင်လုပ်ငန်းနှစ်ခု၊အိမ်ရာအဆောက်အအုံ တည်ဆောက်ဖွံ့ဖြိုးမှု ကဏ္ဍတွင်နှစ်ခု၊လျှပ်စစ်ကဏ္ဍတွင်တစ်ခုနှင့် အခြားကဏ္ဍတွင် လုပ်ငန်းတစ်ခုတို့ကို အတည်ပြုပေးခဲ့ခြင်းဖြစ်သည်။
အတည်ပြုခွင့်ပြုပေးလိုက်သော နိုင်ငံခြားရင်းနှီးမြှုပ်နှံမှု လုပ်ငန်းများမှ ရင်းနှီးမြှုပ်နှံမှုပမာဏ အမေရိကန်ဒေါ်လာ ၅၄ဒဿမ ၅၃၀သန်းကို ခွင့်ပြုပေးခဲ့ခြင်းဖြစ်ကာ အဆိုပါ လုပ်ငန်းများမှ ပြည်တွင်းအလုပ်သမားများအတွက် အလုပ်အကိုင်အခွင့်အလမ်းပေါင်း ၄၃၀၆ ခုကို ဖန်တီးပေးနိုင်မည်ဖြစ်သည်။
 
ထို့အတူ မြန်မာနိုင်ငံသား ရင်းနှီးမြှုပ်နှံမှု လုပ်ငန်းများမှ ရင်းနှီးမြှုပ်နှံမှု ပမာဏ အမေရိကန် ဒေါ်လာ ၇ဒဿမ ၄၂၃ သန်းအပါအ၀င် ၃၂၅၉၆ ဒဿမ ၈၃၄ သန်းအတည်ပြုပေးခဲ့ခြင်းဖြစ်ပြီး အဆိုပါလုပ်ငန်းများမှ အလုပ်အကိုင်အခွင့်အလမ်းပေါင်း ၇၃၆၀ခု ဖန်တီးပေးနိုင်မည်ဖြစ်သည်။