သီးနှံအာမခံစနစ်တွင် တစ်ဧကအထွက်နှုန်းအလိုက် ပရီမီယံကြေးကောက်ခံမည်

ယခုနှစ်အတွင်း စတင်မည့်သီးနှံ အာမခံစမ်းသပ်လုပ်ကိုင်ခွင့်စနစ်တွင် တစ်ဧကအထွက်နှုန်းအလိုက် ပရီမီယံကြေး ကောက်ခံမည်ဖြစ်ကြောင်း ဂလိုဘယ်ဝေါလ် အာမခံကုမ္ပဏီထံမှသိရသည်။
 
အဆိုပါသီးနှံအာမခံကို ရန်ကုန်တိုင်း၊မန္တလေးတိုင်း၊မကွေးတိုင်းနှင့် ဧရာဝတီတိုင်းဒေသကြီးတို့တွင် စတင်လုပ်ကိုင်မည်ဖြစ်ကာ ဒေသတစ်ခုနှင့်တစ်ခုမှာ စပါးတစ်ဧကထွက်နှုန်းမတူသဖြင့် ပရီမီယံကြေးမှာလည်း ကွာခြားနိုင်ကြောင်း ပရီမီယံကြေးအတွက်မူ တစ်ဧကကိုနှစ်ရာခိုင်နှုန်းသတ်မှတ်ထားကြောင်းယင်းကုမ္ပဏီဒါရိုက်တာ ဦးစိုးဝင်းသန့်က ပြောကြားသည်။
 
သီးနှံအာမခံစမ်းသပ်လုပ်ကိုင်ခွင့် ၂နှစ်ကို အာမခံကုမ္ပဏီတစ်ခုကသာ ရရှိထားပြီး အခြားသောကုမ္ပဏီများက ဆုံးရှုံးနိုင်ခြေပမာဏများသည့်အတွက် လုပ်ကိုင်လိုခြင်းမရှိကြောင်း၊အစိုးရ၀န်ကြီးဌာနများ အားလုံးနှင့်ညှိုနှိုင်းပြီး လုပ်ကိုင်ခွင့်ရရှိပြီးပါက အခြားသောကုမ္ပဏီများလည်း ပူးပေါင်းလုပ်ကိုင်ရန် ဆွေးနွေးသွားမည်ဖြစ်ကြောင်း အာမခံလုပ်ငန်း ကြီးကြပ်ရေးအဖွဲ့ထံမှသိရသည်။
 
သီးနှံအာမခံစနစ်စတင်နိုင်ရန် တိုင်းအစိုးရများနှင့် ညှိုနှိုင်းနေပြီး ယခုနှစ်မိုးစပါး စတင်စိုက်ချိန်တွင် လုပ်ငန်းလုပ်ကိုင်ခွင့် ရမည်ဟုမျှော်မှန်းထားကြောင်း၊တိုင်းတစ်ပါးကို စပါးစိုက်ဧက၅၀၀အတွက် အာမခံရောင်းချမည်ဖြစ်ပြီး တစ်နိုင်ငံလုံး အတိုင်းအတာဖြင့် စပါးစိုက်ဧက ၁၆သန်းရှိကြောင်း ဂလိုဘယ်ဝေါလ် အာမခံကုမ္ပဏီထံမှသိရသည်။