ရန်ကုန်မြို့ရှိ တရားမ၀င် ပုဂ္ဂလိက ဆေးခန်းအချို့ကို ယခုရက်ပိုင်းအတွင်း ရှောင်တခင်စစ်ဆေးမည်

ရန်ကုန်မြို့၌ တရားမ၀င် ပုဂ္ဂလိက ဆေးခန်းများ စီစစ်မှုအရှိန်မြှင့်ရန် စာရင်းရရှိထားသော မြို့နယ်အချို့ရှိ ဆေးခန်းများကို ယခုရက်ပိုင်းအတွင်း ရှောင်တခင် ၀င်ရောက်စစ်ဆေးသွားမည်ဖြစ်ကြောင်း ရန်ကုန်တိုင်းအစိုးရအဖွဲ့မှ အကြီးတန်း တာဝန်ရှိသူတစ်ဦးက ပြောကြားသည်။
 
တရားမ၀င်ကုသမှုနှင့် ပတ်သက်သည့်ဆေးဝါးပစ္စည်း ကိရိယာများတွေ့ရှိပါက ချက်ချင်းအရေးယူမည်ဖြစ်ကြောင်း ၎င်းကဆိုသည်။
 
ရန်ကုန်မြို့တွင် တရားမ၀င် ကုသမှုပုံစံဖြင့် ဖွင့်ထားသော ဆေးခန်းဆယ်ခုကျော် ရှိသည်ဟု တိုင်ကြားစာရရှိထားခြင်းကြောင့် အလျဉ်းသင့်သည့်အတိုင်း ရှောင်တခင် ၀င်ရောက်စစ်ဆေးနေခြင်းဖြစ်သည်။
 
ရန်ကုန်မြို့တွင် တရားမ၀င် ဆေးခန်းဟုယူဆသော ဆေးခန်းများကို တရားမ၀င် နိုင်ငံခြားသား ဆေးကုသသူများ ကုသခြင်းရှိမရှိ၊ ပုဂ္ဂလိက ကျန်းမာရေးလုပ်ငန်းလိုင်စင်ရှိမရှိ အပါအ၀င် ပုဂ္ဂလိက ကျန်းမာရေးလုပ်ငန်းဆိုင်ရာ ဥပဒေနှင့်အညီ ဆောင်ရွက်ခြင်းရှိ၊မရှိနှင့် ကျန်းမာရေးနှင့်အားကစား ၀န်ကြီးဌာနက ထုတ်ပြန်ထားသည့်စည်းမျဉ်း၊စည်းကမ်းများကို လိုက်နာခြင်း ရှိမရှိဟူသော အချက်အလက်ပေါ်မူတည်၍ စစ်ဆေးအရေးယူခြင်း ဖြစ်ကြောင်း ရန်ကုန်တိုင်းကုသရေး ဦးစီးဌာနထံမှ သိရသည်။