မိုဘိုင်းလ်ဖုန်းဖြင့် အခွန်ဆောင်နိုင်တော့မည်

အခွန်ထမ်းဆောင်သူများ အချိန်ကုန်သက်သာစေရန်အတွက် မိုဘိုင်းလ်ဖုန်းများရှိ Mobile Banking နှင့် ကွန်ပြူတာအင်တာနက် iBanking အကောင့်များမှတစ်ဆင့် မည်သည့်ဘဏ်မှမဆို အခွန်ပေးဆောင်ခြင်းကို ဇူလိုင်လတွင် စတင်မည်ဖြစ်ကြောင်း ပြည်တွင်းအခွန်များဦးစီးဌာန ညွန်ကြားရေးမှူး ဒေါ်ခင်ယမုံအောင်က ပြောကြားသည်။
 
Mobile Banking နှင့်  iBanking အကောင့်များမှတစ်ဆင့် အခွန်ပေးဆောင်ရာတွင် မည်သည့်ပုဂ္ဂလိက ဘဏ်မှမဆိုမြန်မာ့စီးပွားရေးဘဏ်၊ဘဏ်ခွဲများတွင် ဖွင့်လှစ်ထားသည့် ပြည်တွင်းအခွန်များ ဦးစီးဌာန ဘဏ်စာရင်းသို့ ပေးဆောင်ရမည်ဖြစ်ပြီး တရားဝင်စတင်ပေးဆောင်နိုင်မည်ဆိုပါက ဗဟိုဘဏ်က တရားဝင်ထုတ်ပြန်ကြေညာမည်ဖြစ်ကြောင်း ပြည်တွင်းအခွန်များဦးစီးဌာနထံမှ သိရသည်။
 
ဘဏ်သို့လူကိုယ်တိုင်သွားရောက်ရန် မလိုဘဲမိုဘိုင်းလ်ဖုန်းများမှတစ်ဆင့် အခွန်ပေးဆောင်ရပါက အခွန်ထမ်းပြည်သူများအနေနှင့် ဘဏ်များတွင် စောင့်ဆိုင်းရန်မလိုဘဲ အချိန်ကုန်သက်သာသွားမည်ဖြစ်ပြီး အခွန်ပေးဆောင်ရသည်မှာ ပိုမိုလွယ်ကူသွားသည့်အတွက် အခွန်ထမ်းလည်း ပိုမိုများပြားလာမည်ဖြစ်ကြောင်း လုပ်ငန်းရှင်များကပြောဆိုသည်။