တည်ဆဲအလုပ်သမား ဥပဒေတွေကို စီစစ်သုံးသပ်ပြီး ခေတ်ကာလနဲ့ ကိုက်ညီစေဖို့ ပြင်ဆင်မူတွေလုပ်ဆောင်နေတယ်လို့ ပြည်ထောင်စုဝန်ကြီးဆို

နေပြည်တော်မှာရှိတဲ့ Kempinski hotel  မှာ ဇန်န၀ါရီလ ၁၇ ရက်က ပြုလုပ်ခဲ့တဲ့ တတိယအကြိမ် အလုပ်သမားဥပဒေပြင်ဆင်ရေးနှင့် လုပ်ငန်းအဖွဲ့အစည်းများစွမ်းရည် မြှင့်တင်ရေးဆိုင်ရာ ဖိုရမ်မှာ အလုပ်သမားလူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာန ပြည်ထောင်စုဝန်ကြီး ဦးသိန်းဆွေ တက်ရောက်အမှာစကားပြောကြားခဲ့စဉ် ထည့်သွင်း ပြောကြားခဲ့တာပါ။ အလုပ်သမားကဏ္ဍပြုပြင်ပြောင်းလဲမှုတွေအနေနဲ့ ကျန်ရှိတဲ့ တည်ဆဲအလုပ်သမားဥပဒေတွေကို စီစစ်သုံးသပ်ပြီး ခေတ်ကာလနဲ့ ကိုက်ညီစေဖို့ ပြင်ဆင်မှုတွေလုပ်ဆောင်နေတယ်လို့ အလုပ်သမား လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာန ပြည်ထောင်စုဝန်ကြီး ဦးသိန်းဆွေက ပြောပါတယ်။
 
ယခုကျင်းပခဲ့တဲ့ ဖိုရမ်မှာ နိုင်ငံရဲ့ အလုပ်သမားဥပဒေ ပြုပြင်ပြောင်းလဲမှုတွေ၊ အလုပ်သမားကဏ္ဍ ဖွံ့ဖြိုးတိုးတက်မှု အကြောင်းအရာတွေ အပါအ၀င် ကြုံတွေ့ရမဲ့ စိန်ခေါ်မှုတွေနဲ့ ရှေ့ဆက်သွားရမယ့် အခြေအနေတွေနဲ့ ပတ်သက်ပြီး ဖိုရမ်ကိုဦးဆောင်ကျင်းပတဲ့ နိုင်ငံတွေက ကိုယ်စားလှယ်တွေနဲ့ တက်ရောက်လာသူတွေအကြား အပြန်အလှန်ဆွေးနွေးသွားမယ်လို့ သိရပါတယ်။
 
၂၀၁၅ခုနှစ်က ပြုလုပ်ခဲ့တဲ့ ဖိုရမ်မှာတော့ အလုပ်ရှင်၊ အလုပ်သမားနဲ့ အစိုးရကိုယ်စားလှယ်တွေ ပါဝင်တဲ့ အမျိုးသားအဆင့်သုံးပွင့်ဆိုင် မိတ်ဖက်အဖွဲ့ဝင်တွေ လွှတ်တော် ကိုယ်စားလှယ်တွေ ပါဝင်ပြီး အလုပ်သမားဥပဒေ ပြင်ဆင်ရေး အတွက်သဘောတူနိုင်ခဲ့ကာ ၂၀၁၆မှာ ပြုလုပ်ခဲ့တဲ့ ဒုတိယအကြိမ်ဖိုရမ်မှာတော့ အလုပ်ခန့်ထားမှုဆိုင်ရာ သဘောတူစာချုပ် (မူကြမ်း)ကို သုံးပွင့်ဆိုင် ညိုနှိုင်းဆွေးနွေးဖို့နဲ့ အလုပ်သမားရေးရာအငြင်းပွား ဖြေရှင်းရေးဥပဒေ၊ အလုပ်သမားအဖွဲ့အစည်းဥပဒေနဲ့ ကျွမ်းကျင်မှုဖွံ့ဖြိုး တိုးတက်ရေးဥပဒေ စတဲ့ ဥပဒေ၃ခုကို ပြင်ဆင်ဖို့ အတည်ပြုနိုင်ခဲ့တယ်လို့ သိရပါတယ်။ 
 
တတိယအကြိမ်ပြုလုပ်တဲ့ အလုပ်သမားဥပဒေပြင်ဆင်ရေးနှင့် လုပ်ငန်းအဖွဲ့အစည်းများ စွမ်းရည်မြှင့်တင်ရေးဆိုင်ရာဖိုရမ်ကို ဇန်န၀ါရီလ ၁၇ ရက်နဲ့ ၁၈ရက်တို့မှာ နှစ်ရက်ကြာကျင်းပ သွားမယ်လို့ သိရပြီး ဖိုရမ်ကို သံအမတ်ကြီးတွေ၊ လွှတ်တော်ကိုယ်စားလှယ်တွေ၊ အစိုးရဌာနတွေက တာဝန်ရှိသူတွေ အလုပ်ရှင်နဲ့ အလုပ်သမားအဖွဲ့အစည်းတွေက တာဝန်ရှိသူတွေ တက်ရောက်ခဲ့ကြ ပါတယ်။