တင်ပြတောင်းခံသည့် အသုံးစရိတ်များမှ ကျပ်သိန်းပေါင်း တစ်သိန်းကျော် မန္တလေးတိုင်းလွှတ်တော် ဖြတ်တောက်ခဲ့

ဒုတိယအကြိမ် မန္တလေးတိုင်းဒေသကြီးလွှတ်တော် ဒဿမပုံမှန်အစည်းအဝေးတွင် ဌာနဆိုင်ရာအဖွဲ့အစည်းများက ၂၀၁၈-၂၀၁၉ ဘဏ္ဍာနှစ်အတွက် အသုံးစရိတ်များ တင်ပြတောင်းခံခဲ့ရာ  ကျပ်သိန်းပေါင်း တစ်သိန်းကျော်ကို ဖြတ်တောက်ခဲ့ပြီး ယင်းဖြတ်တောက်ခဲ့သည့် ငွေများကို ဒေသဖွံ့ဖြိုးရေးလုပ်ငန်းများ၌ သုံးစွဲမည်ဖြစ်ကြောင်း အစည်းအဝေးမှသိရသည်။
 
ဌာနဆိုင်ရာ အဖွဲ့အစည်းများက တောင်းခံလာသည့် လုပ်ငန်းအသုံးစရိတ်များနှင့် စပ်လျဉ်း၍ တိုင်းဒေသကြီးလွှတ်တော်ကိုယ်စားလှယ်ကိုးဦးတို့က ဆွေးနွေးခဲ့ကြပြီး မန္တလေးမြို့တော် စည်ပင်သာယာရေးကော်မတီ၊တိုင်းဒေသကြီး အထွေထွေအုပ်ချုပ်ရေးမှူးဦးစီးဌာန ၊ငါးလုပ်ငန်းဦးစီးဌာန ၊တိုင်းဆည်မြောင်းနှင့် ရေအသုံးချ စီမံခန့်ခွဲမှုဦးစီးဌာန နှင့် အခြားအသုံးစရိတ်များမှ စုစုပေါင်းငွေကျပ်သိန်းပေါင်း ၁၀၁၉၁၉ဒသမ ၁၈သိန်းကို လွှတ်တော်ကဖြတ်တောက်ခဲ့ခြင်းဖြစ်သည်။
 
ဖြတ်တောက်ငွေများကို တိုင်းအတွင်းဒေသဖွံ့ဖြိုးရေးအခြေပြု၍ကျေးလက်ဒေသများတွင် လမ်းများ၊သောက်သုံးရေရရှိရေးနှင့် လျှပ်စစ်မီးရရှိရေးဆောင်ရွက်ခြင်း၊မန္တလေးမြို့ ရေစီးရေလာကောင်းမွန်ရေး၊တရားဥပဒေစိုးမိုးရေး နှင့်လုံခြုံရေး လုပ်ငန်းများ၊ကျန်းမာရေး၊ပညာရေး အားကစားကဏ္ဍများတွင် ပြန်လည်အသုံးပြုရန်လျာထားသည့် တိုင်းအစိုးရအဖွဲ့၏တင်ပြချက်ကို လွှတ်တော်က အတည်ပြုခဲ့သည်။
Credit -Myanmar Times Daily