ကမ္ဘာ့လူ့အခွင့်အရေး ကြေညာစာတမ်းပါ အခွင့်အရေးဖောက်ဖျက်ခံရပါက တိုင်ကြားနိုင်

ကမ္ဘာ့လူ့အခွင့်အရေး ကြေညာစာတမ်းပါ အခွင့်အရေးများဖောက်ဖျက်ခံရပါက တိုင်ကြားရန် မြန်မာနိုင်ငံ အမျိုးသားလူ့အခွင့်အရေးကော်မရှင်က မေ၃၀ရက်တွင် ကြောညာချက်ထုတ်ပြန်ခဲ့သည်။မြန်မာနိုင်ငံအမျိုးသားလူ့အခွင့်အရေးကော်မရှင်သည် နိုင်ငံသားများ၏ လူ့အခွင့်အရေးချိုးဖောက်ခံမှုများနှင့် ပတ်သက်၍ တိုင်ကြားစာများကို လက်ခံလျက်ရှိပြီး တိုင်ကြားစာများကို စိစစ်ခြင်း၊စုံစမ်းစစ်ဆေးခြင်း၊ညှိုနှိုင်းဖြေရှင်းပေးခြင်းများနှင့် သက်ဆိုင်ရာဌာနများသို့ဖြေရှင်းကုစားပေးရန် အကြောင်းကြားညှိုနှိုင်းခြင်းများ ပြုလုပ်ပေးလျက်ရှိကြောင်း ကြေညာချက်၌ ဖော်ပြထားသည်။
 
နိုင်ငံသားတစ်ဦးသည် ဖွဲ့စည်းပုံ အခြေခံ ဥပဒေပါ နိုင်ငံသားများ၏ မူလအခွင့်အရေးကို ဖောက်ဖျက်ခံရခြင်း၊ကမ္ဘာ့လူ့အခွင့်အရေး ကြေညာစာတမ်းပါ အခွင့်အရေးများ ဖောက်ဖျက်ခံရခြင်း၊နိုင်ငံတော်က ပါဝင်ချုပ်ဆိုထားသည့် နိုင်ငံတကာလူ့အခွင့်အရေးဆိုင်ရာ သဘောတူစာချုပ်များတွင်ပါရှိသည့် လူ့အခွင့်အရေးများဖောက်ဖျက်ခြင်းခံရပါက ကိုယ်တိုင်အတွက်သော်လည်းကောင်း၊အခြားသူတစ်ဦးအတွက်သော်လည်းကောင်း ၊လူတစ်စုကို ကိုယ်စားပြု၍သော်လည်းကောင်း မြန်မာနိုင်ငံ အမျိုးသားလူ့အခွင့်အရေးကော်မရှင်ရုံး အမှတ်(၂၇)ပြည်လမ်း လှိုင်မြို့နယ် ရန်ကုန်မြို့သို့ လိပ်မူ၍ မှတ်ပုံတင်စာဖြင့်ဖြစ်စေ၊လူကိုယ်တိုင်ဖြစ်စေ တိုင်ကြားနိုင်ကြောင်း ကြေညာထားသည်။
 
လူ့အခွင့်အရေးချိုးဖောက်ခံရခြင်းများတွင် ကလေးသူငယ်အခွင့်အရေး၊အမျိုးသမီးအခွင့်အရေး ချိုးဖောက်ခံရခြင်းများလည်း အကျုံးဝင်သဖြင့် ကလေးသူငယ်နှင့်အမျိုးသမီး အခွင့်အရေးချိုးဖောက်ခြင်းများ ကြုံတွေ့လာပါက တာဝန်သိသူတစ်ဦးက ကိုယ်စားပြု၍တိုင်ကြားနိုင်ခြင်း၊တိုင်တန်းသူ၏အမည် ၊နေရပ်လိပ်စာနှင့် ဆက်သွယ်ရန်လိပ်စာ အပြည့်အစုံ၊ဆက်သွယ်ရန် ဖုန်း၊ဖက်စ်နှင့် အီးမေးလ်တို့ရှိလျှင် ထည့်သွင်းဖော်ပြရန်၊တိုင်တန်းသူသည် မည်ကဲ့သို့ မူလအခွင့်အရေးဖောက်ဖျက်ခံရကြောင်း အချက်အလက်များဖြင့် အမှုနှင့်သက်ဆိုင်သော အထောက်အထားများ ပူးတွဲဖော်ပြရန်၊တိုင်တန်းချက်မှန်ကန်စွာ  ရေးသားဖော်ပြခြင်းဖြစ်ကြောင်း ၀န်ခံလက်မှတ်ရေးထိုးရန်နှင့် တိုင်တန်းသူ၏ နိုင်ငံသားစိစစ်ရေးကတ်ပြားမိတ္တူတို့ပါရှိရမည်ဖြစ်ကြောင်း ကြေညာထားသည်။
 
Credit-Myanmar Times Daily